بە شێوەی گێڕانەوەی ڕاستەوخۆ( سینە بە سینە) یا ناڕاستەوخۆ بە شێوازێکی ئەدەبی و تۆکمە داڕێژرابن، خۆم وەک کارئەکتەری یەکەم یا باشتر بڵێم پاڵەوانی نووسراوەکە دەبینم ، لە گەڵ کزەی هەناسەی سووار و هێزی نەحسی پەژارە و خەمە کان دەگریم و دڵی گۆشتینم پڕ دەبێ لە خەم و مەنجەڵی دەروون هەڵەچێت، خوڕ خوڕ فرمێسک بە چاوەکانما دێتە ئەو ئامێزەی کە تا ئێستایشی لە گەڵ بێ گەرمی بە خۆیەوە نەدیوە،
شایی و خۆشیکان ئەگەر چی مەودایان کەمەو میوانن . وەک هەڵدانەوەی ڕووپەڕەی ڕۆمانەکە پەردەی ناسکی خەیاڵ لادەدات و مزگێنی ئازادی و ڕزگاریێکی هەتا هەتایی لە کڵاو ڕۆژنەی دەروونەوە بە دیاری دێنێ بۆم ،
ژیان هەر ئەو ڕۆمانانەیە کە دەیخوێنینەوە.
سەبر سەبر دەگەیە ئەو قەناعەتەی هیچ کات دەسپێک و کۆتایی یەک ناگرێتەوە، ئەمە وێنەیێکە لە ژیانی هەموو مرۆڤێ، جاری وایە بە خەمەوە دەس پێ دەکات و بە شادی کۆتایی دێ، ئەوەش دەگمەنە، هەزاران جاریش هەر بە نەحسی ونەدامەتی دەس پێ دەکات و هەر بەو ڕەواڵەش قوتاری دێت.
خوێندنەوە لای من ، سەفەرێکە بە ناو سەرجەم مرۆڤەکانی مێژوودا، چاک و خراپ ، هاوڕێیەتی هەموو کەس دەکەی بێ ئەوەی ئازارێ لە دەس کەس ببینی، شاخە و شاخ، پێ دەشت بە پێ دەشت، دێ بە دێ، شار بە شار، لە گەڵ چریکەی هەر کاتژومێرێ ، دیمەنێ تازە، زوانێ تازە، مرۆڤێ نەناسراو دەناسی،
تۆ بێ ئەوەی گوێ بە زەمان بدەی ،شەو و ڕۆژ ، ژەم و ژەمەن، بە دەم هەوراز و نشێو و قۆرت و پێچەکانیا دەڕۆی ، ئەستەنگەکان دەبڕی ، پێدەشتەکان ، تەنانەت شوێنە قاقڕەکان بە چاوی ڕۆح دەبینی و سەرنجی دەدەی ،زەریاکان، وردە شەپۆلی نەرم و نیان. گێژەڵووکەی بەسام ، شنەی دەمەو بەیان، هەوار و سەیرانی هەوارچیان،

لەش بە جێماوێکی وێرانەیە، بیر وەک شا هەڵۆی سەر چیا لە گەشت و گەڕاندایە، بە دووربینی دیدە پێوانەی داحوازیەکان دەکات. ئەمەش جۆرێ مردنە، لەش و ڕۆح ماڵاواییان لێک کردووە، هەزاران فەرسەخ دوورن، نەکیر و مونکەر هەمان دوو هێزی خێر و شەڕن کە ساڵیانە لە ناو کاسەڵەی سەرمان هێلانەیان چێ کردووە، بە دەم ئەم خەیاڵەوە هەر دەڕۆی، بێ خەم لە توێشووی سەفەر و قووم قوومە ئاوێ، تا ئارەقەی نێوچاوانت پێشقەراوڵی ماندوویەتی نیشان دەدەن . مووی ڕەشی سەرو چاوت تا لا دەکەیتەوە بە دەم ئاشێڕی گەردوونەوە بۆز و ماش و برنجی بوون و ئاوڕدانەوە لە دواوە خەونێکی هاڵۆزە.
گەنجی ، ئەوگەنجینەیە کەوتووەتە پشت کێوێکی گەورەوە، نەدەتوانی بیهێنیەوە، نەدەتوانی وازی لێ بێنی، واتە مرۆڤەکان لە گەڵ دووشت گەورە دەبن، بیرکردنەوەی ڕۆژان و شەوانی ڕابردوو ،قسەی گوێ ئاگردان، حەقایەتی سەر قورسی، پەندو ئامۆژگاری دایەگەورەو باوەگەورە.
هێنانە بەرچاوی داهاتووی نادیار. پلان ڕشتن بۆ ملوێنان شت کە نازانی پێی دەگەی یان نا .
ڕۆمان یانی سەربردەی کەسێ، کۆمەڵێ، وڵاتێ ، ڕۆژ ڕەشی ، تێدا چوون بە هەرەوەزی، وێرانی، قات و قڕێ. شایی و هەڵپەڕکێی دوو کەس ، بەخشینەوەی گوێزەوانەی مناڵێ لە گەڕەکەکەدا،
جا لەم نێوانەدا هێندێ چێژی لێ وەر دەگرن و زۆر بە هاسانی لەو دەشت و دەرە سەوزە پۆشە کە نووسەر ( خوڵقێنەر )ڕازاندوویەتەوە تێپەڕ دەبن ،کوردە گوتەنی: ئەوانە لە تەڕ دەخۆن و لە وشکی دەلەوەڕێن ،واتە چ جیاوازیان لە گەڵ پاتاڵا نیە ، هەرچەن خۆیان پێیان وایە مرۆڤن، ئەو هەڵەیە لە گەڵ ئێسک و پرووسکیان گەورە بووە.
بێ ئەوەی هەستی مرۆڤ دۆستانە جارێ بیان هەژێنێ ،
هێندێکیش لە ناو قوڕ و لیتەی چاوەڕوان نەکراودا دەمێننەوە، بە خەمی هەموو کەسەوە ماندوون و بوونەتە مامە خەمەی خەماوی، تا هێواش و لە سەرخۆ دەخنکێن یا بە دەم شۆڵەی ئاگرێکی بێ ئەمانەوە دەسووتێن . هەر ئەوانەش ڕەمزی مانەوەی هەر گەل و نەتەوەیێکن، سومبوولی خۆڕاگری و جوامێری، گرینگ نیە چەندە دەژین، گرینگ ئەوەیە هەن و ناوبانگیان تا دنیا دنیایە دەزرینگێتەوە.
ئەوەی لەم دنیا ڕۆماناویە بە جێ دەمێنێ بیرەوەریێکی کورتە بە جوان و ناحەزەوە، جوانەکە زۆر سەخت دەس دەکەوێ ، زۆر هاسانیش لە دەس دەدرێ کاتێ خۆت نەناسی ، ناحزەکەش بە لێشاوە زوو دەس دەکەوێ بەڵام بۆگەنەکەی تەواو بوونی نیە