شێعری بە ناوبانگی ئەرمەنی
شێعر و خۆێندنەوە: مامۆستا پەرتەو
ئاوارەگەی بیچارەگەی بێ‌خانمانم ئەرمەنی
ماڵد نیەزانم ها لە کوو، ڕووح و ڕەوانم ئەرمەنی
شیرین زوانم ئەرمەنی، دەردت وەگیانم ئەرمەنی
ترسم وە گەردم تا نەکەی، بۊشی بچوو، دەر وا نەکەی
ئمجا م دی دێوانەگەی ئاگروەگیانم ئەرمەنی
ت بەو موسڵمانی بکە، لەی گەورە مێمانی بکە
هەرچی کە خوەد زانی بکە، خوەم ناتەوانم ئەرمەنی
بیخود ئەڕا ترسی؟ خوەمم، قورسە دەمم، خاترجەمم
مانگەشەوە، سایەی خوەمە ها شان‌وەشانم ئەرمەنی
نەۊش ئەوقەرە چشتی نیە، دەر وا کە بارم کەفتیە
هەر یەی چکە نەزری بکە، تەڕ بوو زوانم ئەرمەنی
ئەر یەی کەسی لە دوشمنی پرسی یە لە کوورە سەنی
وە گیان هەرچی کافرە ئۊشم نیەزانم ئەرمەنی
لە خوسە ئاگر گردمە، ڕێ ماڵتان گوم کردمە
ئەر مردمیشە مردمە، مشتێ سوخانم ئەرمەنی
پشتم لە بار دەرد و غەم شکیا نیەزانم چۊ بکەم
دەردم یەسە لە ماڵ خوەم بێ‌خانمانم ئەرمەنی
ڕووژ و شەوم جوور یەکە، دەر وا کە نەومیدم نەکە
ئاخە وە ناشەڕ تازە م، جاهڵ جوانم ئەرمەنی
دەر وا کە زۊتر پەرتەوە، مێمانەگەی ئاخرشەوە
یەی شیشە لەو بەدمەسەوە پڕ کە بزانم ئەرمەنی