مەترسی لەنێوچوونی ژینگەی چێرگەکان (بووکی کوردستان) لە چیای تووڵەکە (نێوان ئاواییەکانی بۆگەبەسی، کوچک، بوغدەکەندی) بەهۆی کۆڵینی کانگەکان
لە ماوەی دوو ساڵی ڕابوردوو کۆمپانیای "کوێستان کاوە" هەوڵی داوە بۆ کۆڵینی کانگایەک لە چیای تووڵەکە لە نێوان ئاواییەکانی بۆگەبەسی، کوچک و بوغدەکەندی. بەڵام بەهۆی هەڵوێستی چالاکە ژینگەپارێزەکانی شارەکانی بۆکان (ڕێکخراوەی ژینبانانی سروشتی بۆکان)، سەقز (ڕێکخراوەی ژیانی سەوزی سەقز) و هەروەها شۆڕا و دێیاری ئاوایی کوچک، لە ساڵی ۱۴۰۰ هەتاوی پێش بەم کارە گیرا و لە لایەن دادستانی شاری سەقز فەرمانی ڕاگرتنی کۆڵینی کانگاکە درا.
ئەم کانگایە لە نێوەڕاستی یەکێک لە باشترین مۆڵگەکانی چێرگدایە و لە ماوەی چەند ساڵی ڕابوردوو، چێرگەکان لەم مۆڵگەیە بینراون و لە لایەن کومیتەی چێرگەوانی ڕێکخراوەی ژینبانانی بۆکان فیلم و وێنەیان لێ گیراوە و بەڵگەیەکی زۆرمان بەردەستە.
ئەمساڵ دوای ماوەیەک، ئەم کانگایە دیسان چالاکی خۆی لەم ناوچەیە دەست پێکردووەتەوە و مەترسی لەنێوچوونی ژینگەی چێرگەکان لە چیای تووڵەکە زیاتر بووە. هەر لەبەر ئەمە دیسان ڕێکخراوەی ژیانی سەوزی سەقز و ڕێکخراوەی ژینبانانی بۆکان، بەدواداچوونەوەیان بۆ ئەم کارە کردووە و داوامان لە سەرجەم خەڵکی ژینگەدۆست و ڕێکخراوە ژینگەپارێزییەکان ئەمەیە پشتگیریمان بکەن و لەم هەڵوێستە نیشتمانییەدا یارمەتیدەرمان بن و هەروەها داواکارین لە تەواوی ئیدارە پێوەندیدارەکان، بەپێی یاسا و بە زووترین کات، پێش بە لەنێوچوونی ئەم ژینگەیە بگرن.
✍️ڕێکخراوەی ژینبانانی سروشتی بۆکان
✍️ڕێکخراوەی ژیانی سەوزی سەقز
✍️دانیشتوانی ئاواییەکانی بۆگەبەسی، کوچک و بوغدەکەندی
مطالب مرتبط
عاشقان ژینگه در سقز حماسه‌ای بهاری خلق نمودند
-
منتشر شده در
سقز رووداو