چاڵی چەپڵە
– حەسەن ئەمینی سەقز
بێ شک کۆبوونەوەو بیروڕاگۆڕینەوە یەکێک لە دەسکەوتە هەرگرینگەکانی کۆمەڵگای پێکەوە بوون و پێکەوە ژیان و گوزەرانە بەتایبەت لە ژیانی شارنشینی دا کە ئینسانەکان بەهۆی کێشەو ململانێ و فڕکەفڕک وهەڵات هەڵاتی رۆژانەی ژیان کەمتر ئەیانپەرژێتە ئاخافتن و راوێژو بیروڕاگۆڕینەوە کە ئەم بیروڕاگۆڕینەوە بۆنووسەروداهێنەروخوڵقێنەری ئەدەبی و هونەری ئەگەر تەنانەت ببێتە دەمەقاڵەیش دیسان یەک لە پێوێستی یە هەرە توخمەو کاریگەرەکانە .
دیارەمرۆڤ بەگشتی هەمیشە حەزی لە ئافەرین و باریکەڵاو چەپڵەو ئەشهەدووکێشانە لە دەوری کاروکردەوەی کە ئەگەر خوڵقێنەرو داهێنەریش بێ ئەوە پتر لەخەڵکی ئاسایی خوڵیای پیاهەڵدان و لەبەرمرانی ئەم و ئەوە
کوردستان و نووسەروهونەرمەندی کوردیش وەک سووچێک لەم گۆی زەوی یە بەدوور لەم حەزوخولیایە نیە
ئەزموونی کۆڕکۆبوونەوەو هەڵسەنگاندن و نرخاندی بەرهەم و داهات و هەڵس وکەوتی مرۆڤ ونەبێ شتێکی تازەبێ هەرلەکۆنەوە بوەو هەتا ئێستایش لەکوردستان بەتایبەت لەگوندەکان لە ساکارترین شێوەی خۆیدا هەبوەوهەیە زستانان لەبەربەڕۆژکەو وەرزەکانی دیکە لە سەربانی مزگەوت و بەر حەوزو کانانی کە “سەکۆ”شیان پێ دەکوت یان لە نێو حوجرەی فەقێیان و سوختەکان دا کە لە هەندێ شوێندا “چەقەخانە”شیان پێ دەگوت چەخماخەی چەلەحانێ و تاوتوێکردن بەردەوام لێدراوەو لەنادڵی تاریکترین سەردەم و بێ ئیمکاناتیدا شرۆڤەو هەڵسەنگاندنی بابەتە ئەدەبی و هونەریەکان کراوەو هەتا رادەیەک دڵ ئێشان و زیزبوون و دەنگدابڕانیشی لێ کەوتەوەتەوە.
ئەمڕۆ لەم چاخ و سەردەمەدا ئیتر رەنگە ئەو شێوە هەڵسەنگاندن ونرخاندنە وڵامدەری کات و ساتی ئێمەی کورد نەبێت ،کا حەمەساڵەی سووزەنی لە باسی لۆزان دا دەڵی “رەخنەی ناوخۆ” کە وشەو رستەیەکی شیاوەو مانادارە کە پێویستە بەخۆمانا بچینەوەو خۆمان لەوپلەوبەرزایی یەی کە چەپڵەو باریکەڵای خزم و کەس و دەروجیران پێی بەخشیوین بێنینەخوارو بێ نان بەقەرزدان خۆمان بخەینە نێو تای شایەن و ترازوو و هێڵەکی لێژنگەلی ئەدەبی و هونەری بێ تەعارف،
وەک ئەنجومەنە ئەدەبیەکان کە بەحەق دەورێکی بەرچاویان لە پەروەردەکردن بەخودا چوونەوی نووسەر و داهێنەری ئەدەبی وهونەری دا بوە
لەهەر گەڕەک وگوند و شارو باژێڕێک کەسانێک بوون و هەن کە لەنێو خزم وکەس دا میرزان و ناوەناوە شێعر و نووسراوەش ئەنووسن بەڵام کە دێنە نێو کۆڕو کۆبوونەوە ئەدەبیەکان بۆخۆیان تێدەگەن کە لەکام پلەوپایەی میرزایدان؟ کەوابوو ئێمە بەرلەوەی مەراسیمی پەردەلادان پێک بێین دەبێ نەجارێک و بگرە دەیانجار کۆڕی هەڵسەنگاندنی رەشنووسی ئامادەی چاپ پێک بێنین کە پێش لەدایک بوونی و پێش ئەوەی کەواو پاتۆڵی کتێب لەبەربکاو ببێتە پیاوی ناو پیاوان لە کۆڕوکۆبوونەوە بێ چەپڵەکاندا خۆی لە چاڵی چەپڵە بێنێتە دەرو مشت و مڕ و تاو وتوێی پێویستی لەسەرکرابێ کە بەرهەمێکی بەپێزو پڕپیت وبەرەکەت و پتەوتر پێش کەش بە کۆمەڵگاو نەتەوەکەی بکات.