لە سەقزەوە تا کوردستان؛ «ئێوارە شێعر» دەنگی شاعیران و زمانی کوردیی کۆکردەوە
سەقزڕووداو ــ ڕێوڕەسمی ئەدەبی ـ هونەری «ئێوارە شێعر» بە بەشداری شاعیران و ئەدیبانی شارەکانی کوردستان و ئامادەبوونی هۆگرانی ئەدەب و هونەر، لە هۆڵی پەردیسی سینەمای سەقز بەڕێوە چوو.
شێعر؛ زمانێک بۆ مانەوە
لەم کۆڕەدا شاعیران و ئەدیبانی سەقز، سنە، مەهاباد، بۆکان و دیواندەرە بە خوێندنەوەی بەرهەمە شێعری و ئەدەبییەکانیان بەشدارییان کرد.
لە سەقزەوە رامان غەفووری، هەژان بابامیری، شوعلە بێگزادە، نیان فاتمی، کوردەوان فەرەجی، فەردین ڕەشیدی، عەبدولخالق ڕەحمانی و پەیمان نیلووفەری، لە سنە عیماد کەریمیان، ئیرج عیبادی و حمیدە بینەندە، لە مەهاباد دکتۆر میهری پاکزاد و نەرمین ئیبراهیمئازەر و لە بۆکان ژیلا بەهرامبەیگی بەشدار بوون.
شێعر لەگەڵ ئەوەی دەربڕینی هەست و جوانییە، ڕۆڵێکی گرنگ لە پاراستنی زمان، گواستنەوەی بیرەوەری و بەردەوامکردنی ناسنامەی کوردی هەیە. «ئێوارە شێعر»یش لە هەمان ڕوانگەوە بوو بە دەرفەتێک بۆ نزیککردنەوەی شاعیران و ئەدیبان و ئاڵوگۆڕی ئەزموونی ئەدەبی.
میوزیک لە تەنیشت شێعر
لە بەشی هونەریی بەرنامەکەدا، میوزیک بە سەرپەرشتیی فەریدون عەزیزی پێشکەش کرا و پێشکەشکردنی بەرنامەکەش لەلایەن خالید فەتاحیەوە بوو.
«ئێوارە شێعر» لەلایەن ناوەندی کلتووری ـ ئەدەبیی وەریشە و نەشری هەژان، بە هاوکاریی ئیدارەی فەرهەنگ و ئیرشادی سەقز، ڕۆژی چوارشەممە ۱۸ی خەرمانانی ۱۴۰۵ لە هۆڵی سینەمای سەقز بەڕێوە چوو.
